Міні-музей “ Беларуская хатка”
Занятак - падарожжа ў сялянскую хату
Да бабулі Васіліны мы паедзем у госці
Занятак-падарожжа ў сялянскую хату (міні – музей)
(для дзяцей старшай групы (5-6 гадоў)
Праграмныя задачы: развіваць патрэбнасць у пазнанні сацыяльнай рэчаіснасці, пазнаёміць дзяцей з сялянскім бытам, асноўнымі рэчамі, іх ужываннем і выкарыстаннем у сялянскай хаце; выхоўваць беражлівыя адносіны да гістарычнага мінулага Беларусі
Абсталяванне: беларускі касцюм, рэчы міні – музея “Беларуская хата”
Ход занятку
Выхавальнік дашкольнай адукацыі (В.). Дзеці, сёння нас запрашае да сабе ў госці бабуля Васіліна. Давайце хутчэй збірацца. (Гучыць беларуская музыка.)
Прыветна вокны пазіраюць,
Нібыта ў госці запрашаюць.
Ну, добры выгляд хата мае.
Цікава... Хто ж нас там чакае?
(Стук у дзверы.)
Васіліна. Міласці просім кожнага ў нашай хаце госцем быць. Тут павячэраць, адпачыць вам давядзецца сёння. Цікавыя рэчы пазнаць, гульні і песні спяваць.
- Бачыце, як у мяне прыгожа! Тут шмат чаго цікавага. А хочаце даведацца, што ў мяне ёсць? Ну дык, падыходзьце да стала.
В. Дзеці, паглядзіце, які прыгожы абрус у бабулі Васіліны. Адкуль ён у цябе?
Васіліна. Гэты абрус захаваўся ад маёй маці. Яго яна ткала сама. Матуля засцілала ім стол, калі чакала гасцей, і ў хаце адразу станавілася святло і ўтульна. Абрус складаецца з двух полак - кавалкаў льнянога палатна, злу-чаных пасярэдзіне прошваю. Прошва - гэта скразны ажурны шоў. Сам абрус упрыгожваецца раслінным арнаментам, крыжыкамі, клетачкамі, палоскамі, шырокімі або вузкімі. Краі абруса ўпрыгожвае махра - распушчаныя ніткі. Раней дзяўчаткі забаўляліся, заплятаўшы махру ў тугія коскі.
А са мной разам жыве ў хаце сябар. Здагадайцеся, хто гэта.
Хто з зялёнымі вачамі
Грозна бліскае начамі?
Мае пухленькія лапкі,
Мае кіпцікі-царапкі?
Спінку пругка выгінае,
Страх на мышак наганяе?
Дзеці - (Кот.)
- Дзеці, вы не бачылі майго ката Васіля? Ён такі свавольнік, любіць хавацца. Давайце яго пашукаем. (Дзеці шукаюць ката і знаходзяць яго на печы.)
В. Печка цяпло захоўвае, вось кот там і спіць.
Васіліна. Ой, ой, дзеці, загулялася я з вамі і зараз нічога не паспею. Сёння я хацела вас пачаставаць смачнай кашай. Ай, вай-вай. Што ж мне рабіць?.. Дзе мой чыгунок?.. А, знайшла. Мой чыгунок моцны, агня не баіцца, таму што кавалі ў кузні адлілі яго з чугуна. - Дзеці, ці ведаеце вы, як варыць кашу? Што для гэтага патрэбна? (Адказы дзяцей.) Добра, дапамаглі вы мне. А каб рукі не апячы, я вазьму вілкі. (Паказывае вілкі, ставіць чыгунок у печ.)
В. Як цёпла і ўтульна ў хаце бабы Васіліны, гут можна паляжаць і пагрэцца. Васіліна. Печ у сялянскай хаце займае пачэснае месца. У ёй не толькі вараць, жараць, але яна і лечыць, аберагае людзей ад хвароб. Хворае дзіця заўсёды клалі на печ, бо печ сімвалізуе здароўе. Здаўна вядома, што калі чалавек уваходзіў у хату, дзе знаходзіўся хворы, то госць павінен перш за ўсё зірнуць на печ, і хвароба ў такім выпадку да яго не прыстане.
Фізкультхвілінка
( рухі ў адпаведнасці са словамі)
Мы рукамі хлоп-хлоп,
Мы нагамі топ-топ,
Мы плячыма чык-чык,
Мы лакцямі тык-тык.
Сюды – раз, туды – два
Павярнулась галава.
Раз – прыселі, два – усталі,
Як пружынкі паскакалі.
Рукі ўверх усе паднялі
І рукамі памахалі.
Раз, два! Раз, два!(хадзьба на месцы)
За работу нам пара.
В. Васіліна, нешта цёмна ў хаце стала, запалі свет. (Васіліна бярэ газавую лямпу.) Што гэта за рэч?
Васіліна. Гэта газавая лямпа. Зараз я запалю яе (запальвае лямпу) і вы ўбачыце, як яна свеціць. У ёй свеціцца агеньчык.
В. Сапраўды, агонь жыве ў газавай лямпе. А дзе ён яшчэ можа жыць? (Адказы дзяцей.)
Васіліна. Нешта вы, дзеці, засядзеліся. А танцаваць вы любіце?
Дзяўчынка. Любім пець мы, жартаваць, У гульні розныя гуляць.
Xлопчык. Як пастаўлю рукі ў бокі,
Самі ногі ідуць у скокі.
Паглядзіце на мяне які я высокі.
Васіліна. Во тож дзеці цяпер пайшлі. I вясёлыя, і спевакі добрыя, і танцоры. I, вядома ж, разумныя? Загадаю я вам зараз загадкі, а адгадкі знаходзяцца ў маім куфэрку. (Адгадку дастае з куфэрка.)
На дварэ стаіць зіма.
Гурбы - як ахапкі.
Мёрзнуць вушы,
Мёрзне лоб,
Як ідзеш без ... (шапкі).
Бягуць - скрыпяць,
стануць - маўчаць. (Боты.)
Чатыры вушкі і два брушкі. (Падушка.)
Раніцу кожную лашчыць,
Сушыць шыю,
Рукі, твар і вушы. (Ручнік.)
Васіліна (паказывае ручнік). Што гэта? Правільна, па-руску "полотенце". А па-беларуску - ручнік. Ён патрэбны для таго, каб выціраць рукі. Хутчэй мыйце рукі і сядайце за стол! Пара кашу даставаць, а то баюся, каб не прыгарэла... Частуйцеся, калі ласка
Гаўрук Л.І. выхавальнік дашкольнай адукацыі
Захавальнікамі памяці заўсёды былі і застаюцца музеі. Для большасці дзяцей менавіта з музея і пачынаецца іх грамадзянскае станаўленне. Тут яны ўпершыню пачынаюць асэнсоўваць сваё дачыненне да ўсяго, што адбываецца навокал, а паняцці “Радзіма”, “родны кут”, “любоў да Айчыны” напаўняюцца новым сэнсам.
Наяўнасць у дзіцячым садку музея дазваляе глыбей вывучыць і асэнсаваць гісторыю, культуру ў мэтах развіцця інтэлектуальных, маральных, культурных і творчых магчымасцей дзяцей, выхоўваць у іх нацыянальную самасвядомасць, патрыятызм, далучаць іх да нацыянальнай і агульначалавечай культуры.
У музеі дзеці бачаць прадметы — праўдзівыя сведкі культурнай спадчыны народа, яго багацця. Вочы свецяцца радасцю і зацікаўленасцю. Да вясковай печы хочацца дакрануцца рукой: здаецца, яна яшчэ дыхае цяплом, пачаставаўшы гасцей верашчакай, дранікамі, пульхнымі блінамі.
Адна справа — бачыць першабытныя прылады на фотаздымках, а зусім іншая — патрымаць у руках гэтыя рэчы. Можна шмат разоў гаварыць аб прыроднай кемлівасці і спрактыкаванасці нашых продкаў, іх уменні прыстасоўвацца да жыццёвых сітуацый і цяжкасцей, а можна прадэманстраваць дзецям драўляную мянташку, якую выкарыстоўвалі нашы продкі для таго, каб навастрыць касу, і паказаць, як гэта рабілася, як можна дрэвам завастрыць жалеза. Хлопчыкі і дзяўчынкі з задавальненнем калышуць ляльку ў зыбцы, прасуюць бялізну з дапамогай валка і качалкі. Праз шэраг свят, экскурсій, заняткаў рабяты далучаюцца да гістарычнай спадчыны.
Запрашаем ў музей " Беларуская хатка"
Выхавальнік дашкольнай адукацыі Гаўрук Л.І.